இளைஞர் இலக்கியம், இளம் வளர்ந்தோருக்கான இலக்கியம், விடலைப் பருவத்தினருக்குரிய இலக்கியம், கட்டிளைஞர்களுக்குரிய இலக்கியம் என்ற சொல்லாடல்கள் ஏறத்தாள ஒரு பொருள் குறித்து நிற்கின்றன.
இப்பிரிவினருக்குரிய எழுத்தாக்கங்கள் சமூக நிலையிலும், கல்வி நிலையிலும் பொழுதுபோக்கு நிலையிலும் முக்கியமானவை. ஊறுபடாத சிந்தனைகளை அவர்களிடத்து வளர்ப்பதன் வாயிலாக வளமான சமூகத்தை உருவாக்க முடியும்.
அவர்களைத் தவறான பாதையில் இட்டுச் செல்லும் சமகாலச் சூழலில் ஆக்கநிலை வழிகாட்டல்கள் முக்கியத்துவம் பெறுகின்றன. அந்நிலையில் நேர்ப்பண்பு மிக்க எழுத்தாக்கங்களையும், கலையாக்கங்களையும் முன்னெடுக்க வேண்டியுள்ளது.
தமிழில் இத்துறையில் போதுமான ஆக்கங்கள் இடம்பெறவில்லை. இத்துறையின் முக்கியத்துவம் இன்னமும் உற்றுணர்வு  கொள்ளப்பட வில்லை. அறிவும், ஆற்றலும், நேர்ச் சிந்தனையும், ஆக்கமலர்ச்சியும் கொண்ட இளைஞர் சமூகத்தின் ஆக்கத்துக்குரிய நூல்களும், கலைப்படைப்புக்களும் உடனடித் தேவைகளாகின்றன. தமிழில் உரிய காலத்தின் தேவைகளை உணர்ந்து இந்நூல் ஆக்கம் பெற்றுள்ளது.
சபா.ஜெயராசா

திருநாவுக்கரசு கமலநாதன் ஆசிரியர் சேவையில் இணைந்து ஆசிரிய கல்வியாளர் சேவையில் முகிழ்த்தவர். விரிவுரையாளர், உபபீடாதிபதி,  பீடாதிபதி எனப் பன்முக ஆளுமைகளை வெளிப்படுத்தி உயர்ந்தவர். கல்வியியல் கற்கையில் 'முனைவர்' பட்டம்  பெற்றவர். தனது சொல் செயலால் தன்னைத் தனியாக அடையாளம் காட்டியவர்.         கல்விச் சூழலில் காலத்தை வென்ற கமலமாகப் பூத்தவர். 

இவர் பெற்ற அனுபவமும் அறிவும் வளமானது.  இதுவே இவரை கல்வி அமைச்சில்  கல்விசார் தரவிருத்திக்கு மதியுரைஞராகவும் இருத்தியுள்ளது. தொடர்ந்து கல்வியியல்சார் சிந்தனைகளை ஆக்கமாகவும் வெளிப்படுத்திக்         கொண்டிருப்பவர். சமூக சமயப் பணிகளிலும் தமிழ்ப்பணிகளிலும் ஈடுபாடு கொண்டு 'வாழ்வின் அர்த்தம்' முழுமையடைய       இயங்கிக் கொண்டிருப்பவர்.