'வானளாவ உயர்ந்த கட்டிடங்கள் சூழ்ந்த ஒரு கொங்கிறீட் காடு போல் மாறியுள்ள இன்றைய நகரத்தில் வாழும் சிறுவன் ஒருவனுக்கு உண்மையான இயற்கைச் சுற்றுச் சூழல் பற்றிய உணர்வை ஏற்படுத்துவதை நோக்காகக் கொண்டு இந்நாடகம் இங்கு தரப்படுகின்றது. கோபாலன் இன்றைய சிறுவன். பூதம் அனுபவ முதிர்ச்சி, மாசற்ற இயற்கையின் வடிவம் பாடல்கள், இசை என்பன இலகுவான முறையில் மெட்டமைக்கப்பட்டு பாடப்படலாம்'

அருளானந்தம் சிறீகாந்தலட்சுமி கல்விசார் நூலகராக யாழ்ப்பாணப் பல்கலைக்கழகத்தில் பணிபுரிகிறார். தொடர்ந்து நூலகவியல் பண்பாட்டைச் சமூக மட்டத்தில் விருத்தி செய்யத் தனது அறிவு, ஆய்வு சார்ந்த புலங்களை குவியப்படுத்திச் செயற்படுபவர். இவர் கல்விசார் நூலகர் என்னும் பதவியை வெறுமனே அலங்கரிக்கவில்லை. கல்வியின் விரிவாக்கம், அறிவுப் பிரவாகம், நூலக தகவல் அறிவியல் போன்றவற்றை தமிழ்ச் சிந்தனையுடன் தமிழர் வாழ்புலத்துடன் இணைக்கும் முயற்சியில் ஆர்வமுடன் ஈடுபட்டு வருபவர். வாசிப்புப் பண்பாட்டின் பன்முகப்பாட்டை வலியுறுத்தும் சமூக செயற்றிட்டங்களை மக்கள் மயப்படுத்துவதில் தீவிரமான ஈடுபாடு கொண்டவர்.